‘E VERMECIELLE A VONGOLE

 

Dateme, oi gente, qualunque fatica:

o liggiera o pesante nun me ‘mporta

(io v’ ‘a faccio cantanno),

ma nun appena è ll’ora ‘e levà mano,

dàteme ‘ncopp’ ‘a tavula

o pure ‘nzino, si accussi vo’  ‘a sciorta,

‘na  ‘nzalatiera  ‘e vermecielle a vongole.

Chisto è ‘o piatto mio, ca nce se mmescano

addore ‘e scoglio ‘nfuso e addore ‘e grano;

chisto è ‘o piatto mio, ca nce se ‘ncontrano

‘o frunnella sfuttente ‘e pertusiono,

‘a resatella d’uoglio senza ‘mbruoglie,

‘a ‘nziria ‘e ll’aglio,

‘o sango sciacquo d’ ‘e pummarulelle…

e ognuno ‘e lloro fa: << Ué, tu ccà stive? >>.

Dàteme, oi gente ‘e cca, na casarella

accussi piccerella,

accussi manierella

ca quanno arrassusia

me n’avess’ ‘a partì,

m’ ‘a metto ‘ncuollo comme a ‘nu vestito

e cuntento o pentito,

si m’accumpagna ‘o vermeciello a vongole,

cchiù vaco fore via

e cchiù a Napule sto.

Dico a Lucia:<< sienteme, e po’ ,

io te voglio cu’ me, carne e respiro,

amica e sposa fino a che moro.

Tu lave e stire e tu, tu me cucine

‘sti vermecielle a vongole

Ca piaceno a me

Comme piaceno a te,

pe’ ‘na raggione antica.

E pure ‘a morte, all’urdemo,

‘a voglio ‘a te comm’ ‘a ‘na furchettata

‘e vermecielle a vongole

ca primma, ‘mponta ‘e lengua e senza chiagnere,

ll’assagge tu.


Giuseppe Marotta